ඊයේ( 27සෙනසුරාදා ) ගෝලාන් හයිට්ස් හි පාපන්දු පිටියකට රොකට් ප්‍රහාරයක් එල්ල වූ අතර කුඩා ළමුන් සහ නව යොවුන් වියේ පසුවන්නන් ඇතුළුව අවම වශයෙන් පුද්ගලයින් 11 දෙනෙකු මිය ගියහ. ඊශ්‍රායල බලධාරීන් ප්‍රහාරය සම්බන්ධයෙන් ලෙබනනයේ ඉරානයේ පිටුබලය ලබන හිස්බුල්ලා සංවිධානයට දොස් පවරා ඇති අතර එය පුළුල් කලාපීය ගැටුමක් පිලිබඳ භීතිය මතු කරයි.
හිස්බුල්ලා ප්‍රහාරයට කිසිදු සම්බන්ධයක් නොමැති බව ඉක්මනින් ප්‍රතික්ෂේප කළේය. හිස්බුල්ලාහි ප්‍රධාන ප්‍රකාශක මොහොමඩ් අෆීෆ් ඇසෝසියේටඩ් ප්‍රෙස් වෙත පැවසුවේ ඊශ්‍රායල පාලනය යටතේ පවතින ගෝලාන් කඳුකරයේ ඩ්රූස් ගම්මානයක් වන මජ්ඩාල් ෂම්ස් වෙත ප්‍රහාරයක් එල්ල කිරීම කණ්ඩායම තරයේ ප්‍රතික්ෂේප කරන බවයි.
කෙසේ වෙතත්, ඊශ්‍රායල හමුදාව පවසන්නේ ප්‍රහාරය සඳහා යොදාගත් රොකට්ටුව “Falaq-1 රොකට්ටුවක්, ඉරානයේ නිෂ්පාදිත ඉරාන රොකට්ටුවක්, කිලෝග්‍රෑම් 50 කට වැඩි පුපුරණ ද්‍රව්‍ය සහිත යුධ ශීර්ෂයක් සහිත රොකට්ටුවක්” බවයි.
මාධ්‍ය හමුවකදී අදහස් දැක්වූ ඊශ්‍රායල හමුදා ප්‍රධාන ප්‍රකාශක රියර් අද්මිරාල් ඩැනියෙල් හගාරි එය “ඉතා බරපතල” සිදුවීමක් ලෙස හැඳින්වූ අතර ඒ අනුව ක්‍රියා කරන බවට පොරොන්දු විය.
ඊශ්‍රායල අගමැති බෙන්ජමින් නෙතන්යාහු නිවේදනය කළේ එම ප්‍රහාරයට දරුණු ප්‍රතිචාරයක් දක්වන බවයි.
ජාත්‍යන්තර විචාරකයින් පවසන්නේ මේ හේතුවෙන් ඊශ්‍රායලය සහ හිස්බුල්ලා සංවිධානය අතර යුද්ධයක් ඇතිවීමේ හැකියාව පවතින බවයි.
